م وه‌یل چه‌یل كؤچه‌یل م پیره‌گه‌ێ موقانم داخ هه‌ژاری خودا ئاگر دا له سقانم
شێوه‌ێ شه‌وار دێرم دڵ بێقه‌رار دێرم ژان ها هناز ماڵم ئاخێنێ ها له گیانم
وه‌یلانه‌گه‌ێ شه‌وار خێاڵ هه‌رشه‌وه‌یلم مانگ چه‌وه‌یله‌گه‌ێ یار ها ناو ئاسمانم
بێ وێنه‌گه‌ێ وڵاتان هه‌ێ نؤر ئاسمانی بڕه‌س وه داد دڵ و شانێ بێه وه شانم
م وه‌یل چه‌یل كؤچه‌یل م پیره‌گه‌ێ موقانم داخ هه‌ژاری خودا ئاگر دا له سقانم
هناس واران
یه چه‌نساڵه له ئێ موڵكه چه‌وه‌یلم خیس وارانه چه‌وه‌یلم چاوه‌رێ هڵم هه‌ناس واێ وه‌هارانه
نه‌مه‌نێه هازێ له‌ێ گیانه و په‌ریشانم له یه‌ێ داخێ ك ئاخ داخه‌گه‌ێ دؤرێ هه جوور جار جارانه
په‌ری خه‌ێو خه‌وه‌یلمان له یه‌ێ به‌رزایی به‌رزێ رێه‌و داگرتێه و قه‌ێرێگه هاورێ ساێ نسارانه
دڵ كووس كه‌فتێ ئیمه له په‌ێ خه‌روار داخه‌گان چه‌نێگه گوم بؤ و میه‌نێ ریێ كؤچه‌یل شارانه
چه‌نێگه ئاو زه‌ل ده‌ێدن له ناو خێاڵ و خاو خوه‌ێ له‌واێ مه‌نسوور هه‌لاجێ سه‌رێ وه بان دارانه
یه چه‌نساڵه له ئێ موڵكه چه‌وه‌یلم خیس وارانه چه‌وه‌یلم چاوه‌رێ هڵم هه‌ناس واێ وه‌هارانه
ئه‌رای چه‌وه‌یل ئه‌سرینی موعین شاهوه‌یسی
باڵاێ بێستؤن
هایده‌كووره شه‌وچراخم به‌رزه باڵاێ بێستؤن گوم بؤمه له‌ێ ده‌روه‌نه چؤ شیرین بێ شوون نؤن
جوور ئه‌و گه‌رمی هناس و جوور ئه‌و قسیه‌یلده واێ زه‌لانێ داسه بافه‌م كردێه‌سه‌م ته‌رفه‌تؤن
چووڕێدن له قامه‌ت و له لێو ماتیكی شه‌وار ئه‌سر هساره‌یل لێژ پڕ له داخ و پڕ له خؤن
بێ ت رمیاێه هناس پا وه ماڵ ئێ دڵه له‌ێ وڵاته بێ ت نه كووماجێ دێرم و نه سؤن
هایده كوو تا كووره چیده جاده‌گان پێچاننه‌م گوم بؤمه له‌ێ ده‌روه‌نه چؤ شیرین بێ شوون نؤن
ژه‌نێار شه‌و
سه‌متؤر دڵم له‌ێ وه‌ره دی ژان ژه‌نێ هه‌ێ گوڵهگهێ م ئاژاوه له ناخ دڵ جاران ژه‌نێ هه‌ێ گوڵهگهێ م
ئاخین شه‌وانه‌ێ شه‌كه‌ت شوون وه جی هیشتن ئیڵ له داخ وه رێ چێین میلكان ژه‌نێ هه‌ێ گوڵهگهێ م
سه‌مفوونی داره‌گان چێ له كیس و له‌ێره سزیاێ هؤرد له هڵم هناس شه‌و واران ژه‌نێ هه‌ێ گوڵهگهێ م
ده‌رد دڵ ئێ شاعێر شێویاێ شه‌و شوون نسرمه هاوبه‌زم سیه‌و سه‌رده‌یێ زمسان ژه‌نێ هه‌ێ گوڵهگهێ م
قه‌ێرێگه له خانه‌قاێ چك چووڵ و پڕه داخ شه‌وانه‌م جه‌رخه‌ێ جه‌م ده‌وریشیێ یاران ژه‌نێ هه‌ێ گوڵهگهێ م
هساره‌گه‌م
دڵم ته‌نگه ئڕاد و خوه‌د نیه‌زانی ت باوان بڵێن نیشتمانی چه‌نێ بێ ت وڵاتم ته‌رفه‌تؤنه ت تێشه‌د ده‌م ژان بێستؤنه م شیرین شینكه‌ر یه‌ێ وڵاتم م ئه‌و خوه‌ره‌مه له پشتد ئڵاتم په‌ڕ سه‌روێنه‌گه‌م بێه شاند هه‌ێ دووس كوه‌ن ئه‌زیزه‌گه‌ێ باواند هه‌ێ دووس
ئه‌هوورا مات ساسانی ئه‌زیزم ت سووماێ ههر دۆ چاوانی ئه‌زیزم تنی خاوه‌ن رووژه‌یل ته‌ماشا له شێوه‌ێ ت پێا نیه‌ودن له هیچ جا كوره ده‌رد تماشایلد له گیانم ك له یه‌كه‌و چه‌كان ره‌زم سقانم كوره بوومه خڕ نازارید دووس وه قوروان ته‌خت و تاج و جید دووس بؤیه عشقد وه خوره‌ێ گیان ئیمه ده‌وارێ داسه جی میلكان ئیمه
ئه‌ڕای ت
رووژه‌یل بێ خوراك شه‌وه‌یل بێ خه‌وم په‌روه‌رده‌ێ ده‌س خه‌ێاڵ و ته‌وم ههر جوور شیرین وه عشق فه‌رهاد یا وه پید ره‌سم یا سه‌ر ده‌م وه باد تونیش جوو فه‌رهاد نه‌كه ئازارم تا ساتێ وه لاد من ئارام بارم ههر وه په‌ێ عشقد سه‌ر دام وه سارا تو وه‌و دؤره چید نیه‌زانم ئه‌ڕا چه‌وه‌ڕێیم بوو دێرم تیه‌م وه لاد ئه‌ێ عشق دیرین نازارم فه‌رهاد باوش گه‌رمد ئه‌ڕام وا بكه شه‌وه‌یل تارم رووژنا بكه بڕیا قه‌رارم وه په‌ێ نیشاند تا ك من بؤنم ڕۆخ تاباند
مه‌نزڵ وه مه‌نزڵ وه شووند گه‌ردم جوور گڵاێ سه‌ر پائیزان زه‌ردم دی وه ده‌س چێه سه‌ور و قه‌رارم خوه‌د نیشان بێه بؤن حاڵ زارم نازاره‌گه‌ێ م ته‌نیا گشكه‌سم نیه‌زام وه وه‌سڵد ئاخر كه‌ێ ره‌سم كه‌ێ ئێ هجرانه وه ئاخر ره‌سێ دڵه شكیاگه‌م ت بؤد وه كه‌سێ به‌و تا بؤنمه‌د شاد بكه دڵم وه قورباند بووم نؤر مه‌حفڵم وادی وه وادی وه شوونم هاتی ئه‌ڕا دێر تره‌ك زؤتر چؤ ناتی گیان شیرینم فه‌داێ په‌نجه‌د بوو نسار رێه‌گه‌ێ قه‌ده‌م ره‌نجه‌د بوو شاد بؤم له دیدار روخ تاباند مێهرم وه فه‌داێ ماه ئاباند هه‌رچێ ره‌نج كیشام له په‌ێ دیدارد فه‌داێ م كردم ئڕاێ روخسارد
باوش گه‌رمد ئڕام وا كردی شه‌وه‌یل تارم رووژنا كردی وه وه‌سڵد ره‌سیم پڕ بارم كردی هزاران بووسه نسارم كردی ده‌س نه‌وازش كیشای وه سه‌رم وه عشق پاكد جه‌م بؤ خاترم جام شه‌راوێ وه پیم نووشانی شه‌رم و حه‌ێاگه‌د وه لیم پووشانی ته‌ك دای وه سه‌ریر ئه‌سر رشانی دڵ شه‌یداگه‌د وه كوو ره‌سانی؟ وه‌تی ئێ ئه‌سره ئه‌سر وساڵه بچم وه قوروان ئێ خه‌ت و خاڵه دی ته‌ركد نیه‌كه‌م تا دۆنیا دۆنیاس ئومر بێ ئه‌رزش بێ تو ههر فه‌ناس ...
جه‌ور زه‌مان
ئمشه‌و چه‌نشه‌وه كه‌فتێه‌سه هؤرم گلاره‌ێ چه‌وم پرشه‌گه‌ێ نؤرم داێه‌ێ ئه‌زیز زامه‌ت كیشه‌گه‌م ته‌نیا ئومیدم ره‌گ و ریشه‌گه‌م ئومر ئه‌زیزد وه پام سه‌ر كردی خه‌م و په‌ژاره‌م وه دڵ ده‌ر كردی سه‌ر وه بان پا تو كیشای نازم تو رقسید وه ده‌نگ ههر سووز و سازم وه یادم نیه‌چوو شه‌ونه‌خه‌فیه‌یلد وه پاێ گاپاره لالائیه‌یلد داێه زامه‌تد هه‌ڵاڵ كه وه لیم تو ره‌سانیده‌م وه ئه‌قڵ سه‌ڵیم ئه‌گه‌ر ك ئه‌ڵان بؤمه‌سه كه‌سێ ده‌سم وه گه‌رمی ها وه ناو ده‌سێ گشتێ نه‌تیجه‌ێ جه‌ور و جه‌فاد بؤ دۆنیا حه‌ێران سه‌ور و سه‌فاد بؤ خوه‌م بكه‌م وه خاك بكه‌فم وه پاد وه ده‌ورد بگه‌ردم هه‌رده‌قه و هه‌رسات جوبرانێ نیه‌كه‌م جه‌ور و جه‌فاگه‌د من وه قوروان سدق و سه‌فاگه‌د داێه وه خودا تاقه‌تم چێه ره‌نگ وه رۆخسارم جوور ئه‌وسا نیه ئمشه‌و به‌و وه لام بوه مێوانم تا ك دواره گیان بگرێ گیانم ئسر چه‌واند ئاو زۆلالم بوو موهه‌به‌ته‌یلد گشت حه‌ڵاڵم بوو ده‌س نازكیشد بكیش وه سه‌رم پاك بكه وه ده‌س چه‌وه‌یل ته‌ڕم دڵم وه گه‌رد دیده‌ێ تو شاد بوو بهشت به‌ڕین وه ژێر پاد بوو
عضو شوید
عضویت سریع
آمار مطالب
آمار بازدید
